PIDATO MALEWAKAN

PIDATO MALEWAKAN / PELANTIKAN PANGULU
DALAM NAGARI KOTO NAN IV KEC. PAYAKUMBUH BARAT

Disusun oleh: Yumasni Ramais Dt. Permato Dirajo Ati Omeh

Assalamualaikum Wr. Wb.

Salam selamat diucapkan
Adat jo syarak dek sadundun
Khilaf nan mintak dimaafkan
Satu salah baribu ampun

Diangkek sombah dianjuang budi
Disusun jari nan sapuluah
Lahienyo jasmani togak badiri
Bathinnyo rohani duduak basimpuah

Disombah sidang niniak mamak , nan godang bosa batuah, andiko adat dinagori, sarato datuak kaompek suku, pucuak bulek ureknyo tunggang, sangsoko dinagori, imam khatib bilal maulana, alim ulama jo tuanku, suluah bendang dalam nagori, dubalang jo ampang limo, jo manti pagawai adat, pagaran koto jo nagori, nan mudo pambimbiang dunie. Tungku nan tigo sajorangan, banamo codiak tau pandai, sumarak koto jo nagori, pamenan luhak nan tigo, umumnyo urang nan ompek jinih, nan dilingkuang alua jo patuk, nan takopuang dilimbago, nan talingka dalam adat, samo talingkuang dalam sombah, dalam tuntutan ambo juo.
Sombah disitu ditimpokan, salam juo nan diangkek, salam juo nan dianjuang.

Kaharibaan:
Bpk. Gubernur Provinsi Sum. Barat.
Bpk. Ketua Lembaga Kerapatan Adat Alam Minangkabau Provinsi Sum. Barat.
Tampuak tangkai dusun jo nagori, payuang panji dalam daerah.
Ibuk-ibuk Bundo Kanduang Sum. Barat, Bpk. Walikota Payakumbuh, Bpk Bupati Limapuluh Kota, sarato Muspida Tk. II.
Bpk. Ketua Lembaga Kerapatan Adat Alam Minangkabau Kota Payakumbuh, sarato Bpk. Camat Payakumbuh Barat saroto seluruh undangan yang hadir.

Bukan basibak jo basisiah, indak bahinggo jo babateh, samo basah bak basimbua, samo konai bak manbiru, sombah jo salam maliputi, dalam soruan ambo juo.
Manuruk kato pusoko, jalan nan pasa dek batompuah, kaji nan lanca dek baulang, kalau basiang dinan tumbuah, jikok manimbang dinan ado, dinan tumbuah iko kini, lah osah siang bak ari, lah nyato torang bak bulan, manuang adapt jo limbago, mamakai adapt nan kewi.
Manuruk barih balobeh adat, didalam cupak nan buatan, iyolah adat jo istiadat, tigo jo syarak nan lazim, ompek jo adapt nan kewi, limo jo undang nan balukih, onam jo cupak nan balupak.
Undang-undang nan balukih, iyolah tiok-tiok suatu nan tumbuah, manilik kito ka asanyo, sobab karano demikian, dirunuk awa ka padoman, akhie bandingan dikuasai, eloknyo bona disalisiak, musihan budi nan sarupo.
Tatkalo maso daulunyo, samusim maso saisuak, manuruk warih nan dijawek sipatan tutua nan didonga, sajak nan dari niniak moyang, jawek bajawek sampai kini, nan satitiak tidaknyo lipua, nan sabarih bapantang hilang, takarang dalam tarambo, sampai sakarang iko kini, manjadi kato pusako.

Dimano solainyo palito
Dibaliak telong nan batali
Dimano turunnyo niniak kito
Dari ateh gunuang Marapi

Basentak turun kabawah, lah tibo diguguak ampang, dilinggundi nan baselo, itulah asa jo mulonyo, jolong malambang jo malateh, mulo malambuak jo malamun, tompek manobang jo manaruko, bakeh batanam baro bilah, sajak samulo bataratak, lalu badusun nan baumpuak, sampai bakorong jo bakampuang, lah jadi koto jo nagori, tabontang lobuah jo topian, badiri balai jo musajik, timbua nagori Pariangan, duo jo koto Padang Panjang.
Bapakai cupak nan piawai, lah batanam nan bapucuak, lah mamaliharo nan ba angok, basawah satampang boniah, makanan urang tigo luhak, nan dibuek niniak kito, datuak Tantejo gurhano, niniak Kolat namo ibunyo, Indo Bio namo bapaknyo.
Nan maatok sambia duduak, nan manurang sambia togak, makanan urang tigo luhak, ulayat lareh nan duo, dek lamo bakalamoan, abih siang baganti malam, habih pakan babilang bulan, baganti tahun jo musim, lah kombang anak kamanakan, koto kian lamo kian rami, kampuang batambah sasak juo, lah ponuah koto Pariangan, lah sompik nagori Padang Panjang,situ bapikia niniak moyang, iyo bak andai jo gurindam, papatah bida caro Minang:

Alam nan leba kalau lah sampik
Disusun adat ka limbago
Kalau batinggang dinan sulik
Lauk budiman kiro-kiro

Bumi loweh dunie ko lapang, antahlah kok sogan mahuni, dek bijak niniak jo moyang, ditambah koto jo nagori, dicari tanah nan data, dikaki gunuang Marapi, bakeh mambuek korong jo kampuang, mandirikan koto jo nagori, tagak dek rundiang nan saukua, dek baiak bona sasuai, sapokat karojo lah manjadi, dapeklah buni nan elok, alam nan suni bakeh diam, disungai dikayu tarok, lah dicancang lah dilateh, sampai dirambah jo dilamun, sabagai tompek kadiaman, dikualo urang Padang Panjang, sarato koto Pariangan, pindah katanah nan data, sampai sakarang iko kini, namo tak lipua dek hujan, banamo luhak Tanah Data.

Luak panduduak Pariangan, jo rakyat koto Padang Panjang, pindah ka Tanah Data, lah kombang biak disanan, Tanah Data batambah loweh, baujuang lobuah tanjuang Sungayang, ba Limo Kaum duo boleh koto, sampai bakoto Pagaruyuang, nan Pariangan Padang Panjang , lah batambah rami juo, diulang pulo malukai, pindah karanah luhak Agam, diatehnyo Kubuang Tigobaleh, saolah mudiak Pinang Manguang, pindah nan mulo parangkatan, ompek kaum sakali angkek, manopek kaluhak Agam, situ bacorai nan ampek kaum, mambuek korong jo kampuang, mambangun koto jo nagori, tapi bacorai tak baragiah, dek cakap niniak jo moyang, tumbuahlan nagori ompek koto, Agam Biaro Balai Gurah, ampek jo lambah nan panjang.

Lah siap pulo nan ampek itu, dating barangkek nan kaduo, masuak karanah luhak Agam, dibuek pulolah nagori, dek urang angkatan nan kaduo, tadirilah nagori ampek buah, iyolah Krai jo Banuhampu, Sianok jo Koto Gadang. Tibo angkatan nan katigo, ampek juo sakali angkek, dibuek nagori ampek pulo, iyolah Sariak jo Sungai Pua, batagak batu palano. Datang angkatan nan ka ampek, itu parangkatan nan pangabisan, tadiri nagori ampek pulo, iyolah Guguak, Tabek Sarajo, Balingka, Koto Pambatan, salasailah Agam, Ampek Koto, Anambaleh Koto. Baitu warih nan dijawek, baitu tutua nan didonga, jauah nan buliah ditunjuakkan, ampiang nan buliah dikakokkan.

Dek lamo bakalamoan, rakyat batambah rami juo, dikuaki pulo hanyo lai, nagori Pariangan sarato rakyat Padang Panjang, poi kakumbuah nan bapayo, sabanyak limo puluah urang, iyolah limo puluah kaum. Barangkeklah urang limo puluah, manuju kumbuah nan bapayo, dek ari potang lah sanjo, bamalamlah urang limo puluah, dtongah padang biru-biru, dibumbuang Baleh Panjang, namun bariak hari siang, dek hatta takadia Allah, hilanglah rombongan duo kaum, satu kaum datuak Mareko Putiah Gigi, timbuanyo di Kampa Kiri. Kaduo rombongan datuak Mareko Panjang Jangguk, tapasah ka Kampa Kanan. Dalam rombongan nan duo itu, urang nan limo badunsanak, mambuek nagori masing-masing. Iyolah Kuok jo Bangkinang, Salo jo Rumbio, limonyo Aie Tirih, nan babapak ka Limo Puluah, nan badatuak ka Pagaruyuang, sabab karano demikian, luak nan bungsu Limo Puluah, duo sabab dek banamo luak, satu dek urang Pariangan Padang Panjang, dating sabanyak limo puluah kaum, kaduo dek luak Limo Puluah, hilang di Padang Siontah, lah jadi namo sampai kini.

Manuruk barih balobehnyo, nan kito jawek sampai kini, wilayah luhak Limo Puluah, iyolah sajak sisauak Sungai Rimbang, dari Sialang balantak bosi, hinggo durian ditakuak rajo, dari sipisak pisau hanyuk, hinggo silukah pinang tungga. Sajak pinang mancuang hilie, hinggo Gunuang Sahilan mudiak, itu nan barih luhak Limo Puluah.Tunggaknyo balai nan duo, sarato galanggang nan satu, parmato balai joriang di Aie Tobik, bakeh malukih undang-undang, manuang adat jo limbago, disanan gantang dibolah, disitu cupak diagiah, kaduo balai kubang nan dilareh, didalam goduk tobiaang tinggi, tompek maagiah omeh manah, hak daciang pangaluaran, ubua-ubua gantang kamudi, omeh manah tukuak bubungan, nan satahie nan saomeh, nan piyak nan sabusuak, nan sakundi sakandio, nan sacupak saulang aliang, nan sapotiang tali bajak, nan sakipeh longan baju.
Katigo galanggang sijambi, dibagian ranah limopuluah, tompek mamadu jo bapadan, himpunan jonang jo joaro, bakeh manyabuang ameh perak, maadu ereng jo gendeng.

Didalam luhak limopuluah, balimo rajo disanan, nan partamo rajo diluhak, nan kaduo rajo dilareh, nan katigo rajo disondi, nan kaompek rajo dihulu, nan kalimo rajo di ronah.
Nan dikatokan sondi dalam luhak limopuluah, iyolah balai batimah dititian aka, balai godang di payokumbuah, sondi alam hubungan koto, panyambuk gayuang dari langik, panyampaian kaba dari bumi datuak permato alam nan putiah namo sokonyo, disipisang koto nan godang, banamo rajo disondi, pamatang luhak jo lareh, sarato ronah jo hulu,jatuah kaluhak sondi luhak, jatuah kahulu sondi hulu, banamo sondi nan satu, nan sondi dipayokumbuah, sajak dari bukik cik kabau hilie, hinggo muaro mudiak dari nasi rondam katopi hinggo padang somuk katongah, itulah yang dinamokan sondi dipayokumbuah, sondi luhak limopuluah banamo balairong godang, sarupo siang jo malam pamenan kasadonyo, sajak nagari lah bakabuang, badiri koto nan godang, duo jo koto nan ampek.
Manuruk barih balobehnyo, nan dikatokan koto nan ampek, sajak dari sawah liek mudiak,hinggo bukik cik kabau hilie dari nasi rondam katongah, hinggo padang somuk katopi, koto ompek jorong salapan, dusun tujuah tanjuangnyo limo, oso nunang jo parik rantang, anaknyo koto dipolam, rapeknyo kabalai batimah, didalam jorong parik rantang. Kaduo padang tongah jo padang tinggi, anaknyo aua sigalombai, rapeknyo kabalai tabuah baukie, didalam jorong padang tinggi.
Katigo tanjuang godang jo sungai panago, anaknyo koto mandindiang, rapeknyo kabalai polam didalam jorong tanjuang godang.
Kaompek bulakan jo koto bosa, anaknyo payoh nan dalam, rampeknyo kabalai kandi didalam jorong bulakan balai kandi.

Nan bakpapatah katobida, dek pulai bapangkat naiak, basusun ruweh jo buku, manusia bapangkat turun. Maninggakan adat jo pusako ampek jonjang tango diateh.
Partamo rajo adat disambilan, hukum adie katonyo bona, sombahnyo tunggang titahnya kodim, dondam abih kasumat putuh, damai ampiang sangketo jauah, urang kamouang bulieh sojuaknyo kok tidak pandai batinggang, urang kampuang dimabuaknyo.

Kaduo rajo ibadat dilimo nan tujuah, suluah bendang comin nan toruh, manorangi baginan kolam, aie joniah basayaknyo landai mansucikan lahie jo batin, tompek maniru manuladan, bakeh mamandang baso jo basi tidak menyimpang pado sarak totap pado agamonyo kok kurang rukun jo sarak apo karajo tak baguno.

Katigo pamuncak adapt diompek niniek, kayu godang mandulang bukik puucuak bulek salaro kuniang jatuah talayang katompeknyo diam di adat jo limbago mamogang bungka jo tarajo kok elok utang mamakai kok lomak utang mamakan kok tidak mukosuk sampai, apo karajo buang bayaran.

Kaompek simpanan adat dibodi caniago, banamo peti bunian adat ponuah dek alua jo patuk sombuah dek rundiang kato bona nan tidak pueh di nan elok, nan tidak posai di nan baiak salamo alua baturuk sajak adapt bapakai luruh tak buliah diilakkan kasungguh bona lah sampai totap takinci disimpanan.

Nan dikatokan suku sambilan didalam nagori koto nan ompek disabuk juo sambilan ompek perompek, adolahsambilan banyak kampuangnyo, yaitu simabua jo pisang, disobuk nan sarasuak, koto jo sikumbang,disobuk nan sarasuak, tanjung jo poyoboda, disobuk nan sarasuak, dalimo piliang dan pagar cancang, disobuk nan sarasuak, banamo tigo buah poruk, nan batali adat kasuku bodi caniago, dalam nagari koto nan ampek.