KATA PERSEMBAHAN

PERSEMBAHAN SIRIAH

Awa mulo rundiang disobuk, samo manyorah pado Allah, samo maikek kato nobi.
Allah taala kayo sungguah, rasul Tuhan nabi Muhammad, pangulu sagalo alam
Warih nan indak buliah ilang, satitiak bapantang lupo, sabarih tak nan lipua
Sajak daulu lah tajoli, sampai sakarang iko kini, kito nan utang manuruti

Adat cupak labuan kato, itunyo gantang nan tatogak, banamo cupak nan piawai
Didalam taraju bayang, adat sorah sombah lah tibo, karangan buek nan tagamba
Sungguah nyato bona lah tontu, lah samo kito topati

Limbak nan dari pado itu:

Adat badiri dalamnyo patuk, sorak bamohon kapado dolia, kami sakaji samo pokok
Ujuk hakikat lah disusun, poham sambunyi dilahiakan
Nak nyato osah siang bak ari, nak jaleh torang bak bulan, toluak nak diam dilikunyo

Limbak nan dari pado itu:

Agak salewai samo basah, samo ancaw bak basimbua, kok kurang sapo jo togua
Dek buiah concang manconcang, dek ombak dugo mandugo
Sodang babaluk sombah tibo
Agak kok gawa sipangkalan, kok ragu juaro jonang
Duduak kok indak sabunjaran, togak kok indak sabandingan
Diharap ampun karedaan, maaf dimintak pado Dt.

Lua nan dari pado itu:

Adat nan duo salanggano, concang nan duo sagaragai
Nan bak andai kato bida, tasosak puntiang diulu, dibawah kuliran taji
Asa mulo rundiang daulu, tigo limbago nan tajoli

Partamo, sombah manyombah, kaduo basi jo basi, katigo siriah jo pinang
Sombah manyombah dalam adat, tali batali undang-undang
Tasobuk dimuluk manih, bapakai baso jo basi

Muluk manih calempong kato, baso baiak gulo dibibia
Dek buek pakai bauni, dek jonji kato mufakat
Dek luruh tak dapek tidak, namun adat bapakai juo

Bamain ereng jo gendeng, batimbang baso jo basi
Didalam adat nan bapakai, panuruk alua nan tigo tu

Tagak dek olek basi pangkalan, dek cakap anak kamanakan
Talayang siriah jo pinang, taunjuak kamuko Dt.tibo dimuko nan basamo

Nak nyo salamat samparono, nak sampai niat nosa kito
Siriah sacabiak nak bakunyah, pinang sadidih nak bagotok
Itunyo sombah salam kami, bunyi diharap nak kumbali.


Jawaban:

Nan sapanjang pasombahan Dt. Nan talimpah kapado kami, iyolah kato sabonanyo
Tapi samantangpun baitu, nan bak ibarat kato bida
Sapanjang paniliak poham kami, sapokat basondi bona, saiyo poham mananti

Duduak togak batingkek barih, jan comeh dilimbua pasang
Sompik nak dapek solang tinggang, lapang baralah nak saleso
Angin jo ribuk nak sarikat, lopa maana nak satuju

Nan kato iyo baitu:
Duduak basamo dinan rapek, samantaro kato diukua, mananti Dt. sakatiko.


Sungguahpun Dt. sorang baduo nan dituntuk, tumbuah sarupo iko kini
Bunyi lah samo kito donga, rupo lah samo kaliatan
Baa kaelok kabaiaknyo

Aluran gayuang kamanyambuk, ataupun kato kamanjawab
Iyo nak dari Dt. pulang maalum pado Dt.


Lah sampai rundiang Dt. dek gunuang tapatan kabuk, disungai jalo bamain, kapadang marontang tanah, karimbo bakorek kayu, tobiang ditingkek dengan janji, rimbo dialah jo mufakat, tagak dek duduak dinan rapek, limbago basidang dalam adat,

Kaik bakaik rotan sago, bakaik kaik jo durinyo, samantaro baiak salosai, supayo rundiang nak saukua, supayo satuju kanan baiak, nak sapokat kanan elok, suto jo turak nak salosai, nak samo naiak diantakan, diukua kato nan sapatah, mananti Dt. sakatiko.


Adopun tawalak kato cako, dilatak dalam mufakat, diambiak bulek sagolek, tagak dek padoman adat, dek adat duduak barapak, dek pusako duduak basamo, talalai rundiang bakeh Dt. ampun jo relah kami pintak.
Tontangan rundiang Dt. cako, nan talimpah kapado kami, lah tabayang ujuk mapahum, lah tontu tujuan bathin, Dek kami sipangkalan, lah basuo kato bida, lah lomak kato dilega buni, lomak siriah lega carano, bulek aie kapambuluah, lah bulek kato kamufakat, bulek buliah digolekkan, pipiah lah buliah dilayangkan, kaateh lah bapucuak, kabawah lah baurek, kok kondak raso kababori, pintak lai kabuliah, tapi samantangpun baitu.
Tontang minum jo makan, saroto duduak dijamuan, makan kok kurang konyang, minum kok kurang sojuak, duduak kok kurang endah, dek manusia basifat khilaf, Tuhan Allah basipat Qadim, basobalah kami kasiolek, tontangan rundiang nan baitu, dimintak maaf banyak-banyak, kapado dunsanak nan mandatang, sakian salam dari kami.


Lah sampai dek Dt. sapanjang parundingan Dt. nan mandating kapado kami, bunyi lah samo kito donga, rupo lah samo kito liek, kilek baliuang lah kakaki, kilek comin lah kamuko, hanyo baato nyo lai kini, tontangan minum jo makan, saroto duduak kami ditongah rumah, kok makan iyolah konyang, kok minum iyolah sojuak, kok duduak nyato lah endah, indak ado nan sumbiang, boneh lah cukuk satangkainyo, lah elok ditimpo baiak, lah lomak ditimpo maniak.
Limbago pintak lah babori, kondak kok lah bapalakukan, salamat kami nan poi, santoso urang nan tingga, lain hari kito basuo, maaf jo rela kami pintak, sakian sajo sombah kami.



BEBERAPA MACAM PENYIMPAN KATO PASAMBAHAN

1. Nan sapanjang rundiang Dt. itulah kato sabonanyo, nan bak ibarat rang mandaki, gunuang tinggi kadidaki, jalan nan rimbo kadituruk, hanyo sakarang iko kini, malakik jauah kadijalang, manjalang dakek kadisombah, kato dilatak dalam barih, bona disimpan dilimbago, mananti Dt. sakutiko.
2. Nan sapanjang kato Dt. cako, nan bak ibarat kato bida, bak umpamo kapa laie, balayie dilauk lopeh, godang dialam nan sajati, iyo diranah Minangkabau, dipandang ilie jo mudiak, diliek kiri jo kanan, patuk rundiang dilatakkan, samantaro kami baiyo, sifat mananti malah Dt.
3. Nan sapanjang rundiang Dt. iyolah kato sabonanyo, tapi samantangpun baitu, bak ibarat olang-olang, dikarang tunggak jo bingkai, ditutuk jo karoteh putiah, dibori baikua bakipeh-kipeh, tarontang boning jo taraju, dilopeh sadang bak kini, etan kaangin nan basoru, iyo kaawan nan bagajuju, satibo inyo disanan, bapunta-punta jo awan, babego-bego jo kabuki, badan jauah buni lah ampiang, dipaniek kumpulan banang, jangko togang dikanduri, taraso kondua ditagangi, kok putuh sadang bak kini, tagamang kumpulan ditinggakan, nan sakarang iko kini, malakik boning kakumpulan, manjalang tangan kataraju, dilatak dalam barih bona, kato diambiak jo mufakat, mananti Dt. sakutiko